讲述：周国尚

记录：叶焕然

早时候，有一份人家，屋里交关穷，连饭也呒没吃，男人每日穿件长衫，东走走，西走走，生活懒做，白话聊天讲讲，就在人家屋里吃饭。大家都叫他“白话先生”。

有一日，有两个人讲了：“白话先生专门在别人面前吹牛，说他老婆咋好，咋贤惠！今朝阿拉到他屋里去，是真是假，一看就晓得了！”

两个人边商量边走，来到白话先生屋里，他们一进门就问了：“某阿嫂，某阿哥呢？”

白话先生老婆一忖，这两个客人，早勿来，迟勿来，快到吃昼饭了，总得留人家吃饭。可是，屋里柴没柴，米没米，男人又勿在家，她心里着急，表面上还是客客气气接待客人，端凳送茶，稳住客人，她悄悄从后门走出，东寻西寻，总算把老公寻着了。

这时，白话先生坐在一份人家，刮桌打凳在讲白话，团团圈圈围拢一大堆人。老婆心忖，当着介多人讲出自己屋里柴没柴，米没米，要倒霉格，没办法，只好同老公打哑谜了。

老婆讲：“将军庙来了一对招风笑，金乌沙呒金乌沙，当郎千呒当郎千，我只有镬里栈了。”

旁边介多人一点也听勿懂。那末她这几句是啥意思？就是讲：屋里来了两个客人，米没米，钱没钱，我只好哭了。

别人听勿懂，她老公一听，喔唷一惊，心里忖，屋里呒米呒柴，呒铜钿，两个客人走进咋招待？他装作呒介事，对老婆讲：“将军庙里有凤凰晒，可以拿到大呈厢，有郎当千，有金乌沙，还有三酉。”三酉就是三点加酉是个酒字；凤凰晒就是讲屋里还有件衣裳，可以拿到当店里去当了，这样一来，铜钿有了，可以买米买菜买老酒。

老婆一听，二话不说就转屋里，闷声勿响把衣裳当掉，籴米买菜打老酒，留客人吃昼饭。等老婆刚刚把饭菜烧好，老公两手甩甩回转屋里，摆好酒菜请人客。

从此，白话先生有个好老婆的事，就这样传开了。