讲述：周国尚

记录：叶焕然

早先，有个教书先生，家里交关穷。这年抬进老婆，更是背了一身债，邻舍隔壁统借遍了。田里生活他又勿会做，呒人请他教书，屋里就呒没安家粮，俩夫妻真愁煞。

有一日，屋里来了一个人，问教书先生：“对江有户大人家，要请教书先生，侬肯去吗？ ”教书先生一听，真高兴煞，便满口答应了。临走时，老婆对他说：“侬去教书，屋里柴米统统呒没了。侬一到老板屋里，先把安家粮带来。”

教书先生到了这份人家，老板待他交关客气，当日就摆了一桌酒，请先生坐上横头，叫儿子出来拜过先生。他肚里忖：我在这里喝酒吃肉,老婆还在屋里等着我要安家粮呢！本想开口问老板借钱，忖忖又怕失面子，咋好一到就借钱，等十日五日书教过了，再借也勿迟。

啥人晓得，老婆每日抬头盼，等等安家粮呒没带来，等等呒没带来，真等得急煞了。这日，正好有人要过江去，来问教书先生老婆：“师母，今朝我要过江去，侬有信带伐？”“有！”过去女人勿识字，这封信咋写？她忖来忖去，画了一张画，交给带信人。

信带到对江，先生把信拆开一看，是张画：老婆站在灶沿横头，眼泪汪汪；镬里滴滑，米一粒也呒没；一只米升放在灶横头上，倒头笃着。先生心里明白，老婆屋里呒柴呒米在饿肚皮，她来催安家粮了，咋弄弄，只好硬着头皮去向老板借。他刚想去借，老板正好进来，问：“听说师母带信来了，写点啥？”先生忖这封信里呒没写一个字，是张画，咋讲讲好呢？索性把信递给老板，老板拿过来一看，喔！原来师母在屋里呒没安家粮了，铜钿也呒没用了。侬为啥勿早讲？老板交关同情，就给先生一百块洋钿，连明年上半年的工钿也预支给他了。

先生交关感激，他忖，这一百元带回去，屋里的安家粮有了，债也好还清了，赶快写封回信，让带信人明天带回去。这封信咋写写，老婆勿识字，他也画了一张画：一株杨柳树，树上有八只八哥，四只斑鸠，树下一只捣臼。

第二天，带信人心里忖，这教书先生真阔气，一次就带回去一百洋钿。这封信里写点啥？他走到半路，把信拆开一看，是张画。信里呒没提到一百块洋钿。他忖，我这几天手头紧，先调头五十块用用，过几日再还给她，反正信里呒没写清爽。就这样，带信人把五十块洋钿和一封信交给师母。

师母把信拆开一看，对带信人讲了：“先生带回来一百元，咋会只有五十块？”

带信人讲：“哪里写着一百块？”

师母讲：“八只八哥，是八八六十四；四只斑鸠，是四九三十六， 加拢来勿是一百块是多少？ ”

带信人又问了：“那这株杨柳树和一只捣臼是啥意思？”

师母讲：“先生下半年勿回来了，要到明年春天，杨柳抽芽时才回来。这捣臼是阿拉夫妻生儿子的事，侬勿晓得介！”

带信人听了，心里暗暗佩服， 莫看师母勿识字，生活蛮好，只好把另外五十块拿出来还给了师母。