讲述：潘秋根

记录：叶焕然

有一日，内河船里乘着三个客人，一个和尚，一个教书先生，还有一个大姑娘。和尚年纪蛮轻，一双眼乌珠溜溜盯牢大姑娘；教书先生也勿正经，有讲呒讲，寻大姑娘搭腔，还想出个主意要同和尚、大姑娘对课打赌，啥人赌输啥人付航船钿。航船老大心里忖，只要有人付船钿，管侬啥人赢啥人输；大姑娘勿答腔，勿理勿睬；和尚巴勿得同大姑娘寻开心，和尚讲：“船里只有三个人，啥人勿讲也算输。”他勿管大姑娘愿意勿愿意，便开口先讲：“新经念，弥陀盖， 念佛修行人人爱，若有人勿爱，西天活佛何处来？”和尚一边讲，一边看着大姑娘，意思是：我这个西天活佛侬爱勿爱。大姑娘也看出这个贼和尚勿怀好意，但想到大家乘一条船，只当呒没看见。

教书先生一听和尚往自己脸上贴金，他就抢着讲：“红字写，黑字盖，读书写字人人爱，若有人勿爱，文武百官哪里来？”

大姑娘坐在那里闷声勿响，教书先生乘机上去搭腔：“姑娘侬勿讲，侬付船钿。”大姑娘肚里气臌臌，付几个船钿小事，这口气吞勿落去，讲就讲：“阿拉女人少出门，呒见过世面，要是讲勿好，侬拉甭见笑。”和尚马上讨好地讲：“勿要紧，只管讲。”

大姑娘讲：“水粉妆，蜜糖盖，风流之事人人爱，若有人勿爱，教书、和尚何处来？”

船老大一听哈哈大笑：“还是姑娘讲得好。”和尚和教书先生明明晓得大姑娘讨便宜，要想报复，呒没话柄，自认吃亏又勿肯。就在这辰光，航船正好摇到清和桥。教书先生—看肚里打算盘，断命和尚开头，土里土气给自家贴金，反落得被小娘讨了便宜，这遭我要上真场了，看侬和尚还敢勿敢往自家脸上贴金，看侬小娘还有啥本事得罪我。他主意拿定，开口讲了：“前头是清和桥。清和桥三个字，阿拉各自认定一个字来做文章。”

和尚一听马上叫好，他讲：“教书先生好主意，阿拉三人还是老规矩，我先讲。有水也是清，无水也是青，去了清边水，加争便是静。静静修修修过桥，观音度我上莲台，肩背一只木鱼袋，同到西天见如来。”

教书先生接着讲：“有口也是和，无口也是禾，去了和边口，加斗便是科。科科考试飞过桥，一场考中是秀才，肩背一只笔墨袋，连考三场做府台。”

和尚连连叫好，眼乌珠盯着大姑娘：“看起来要这位大阿姐付船钿了！”

大姑娘睬也勿去睬他，开口就讲：“有木也是桥，无木也是乔，去了桥边木，加女便是娇。娇娇滴滴人人爱，生出两个儿子来，老大西天见如来，老二考中做秀才。”

教书先生同和尚让他讲得闷声勿响，船老大本来想笑， 但一忖勿对，这三个人都讲得蛮答对，只怕呒人付船钿，他一边摇橹一边唱了起来：“橹带长长，橹叶扁扁，我航船撑过多年，勿怕侬拉赖船钿。”