讲述：周国尚

记录：叶焕然

有个教书先生带着一个学生到外面去。这日天气交关热，两人翻山越岭走得满头大汗，便坐在大树下乘凉歇脚。离他们不远的地方，有一份人家，先生感到口渴，叫学生去讨碗茶来喝喝。学生子走进这人家屋里一看，只见一个老太婆坐着摇纱。学生讲：“喂，老太婆，我先生要茶喝，有伐？”

老婆婆一听，满肚子勿高兴，对学生讲：“我屋里茶是有的，可勿是随便啥人都好吃的，我有三句话给你猜，猜得出，给侬先生吃茶。”

学生子讲：“啥说话，侬讲。”

老婆婆讲：“啥东西顶浅，啥东西顶深，啥东西顶难。”

学生猜勿出，只好回到先生跟前勿高兴地讲：“这个老太婆介勿客气，讨碗茶喝，还要别人先猜三句话，猜出有喝，猜勿出呒喝！ ”

先生一听，晓得学生讲话得罪人了,便问：“三句啥说话？”“顶浅，顶深，顶难。”

先生心忖：顶浅，是阿拉读书人用的砚瓦顶浅，只有一滴滴水好倒。顶深，是海，比海深呒没了。这顶难，先生也猜勿出了。对学生讲：“侬再去讨。侬对老婆婆讲，顶难先生也猜勿出，请老婆婆指教！侬记牢，勿好没规倒矩叫她老太婆，要称呼老婆婆。”

学生子只好再去。这次他态度两样了：“老婆婆，我先生也猜勿出，要请老婆婆指教！他嘴巴真渴煞了，讨杯茶吃吃。”

老婆婆讲：“小囝呀小囝，早叫我老婆婆，我茶也早给侬吃了。”

老婆婆把茶递给他，又讲：“顶浅是眼孔，侬眼孔浅勿浅。如果侬碰到大姑娘，侬就会阿妹嗳，阿妹嗳，叫得交关客气；顶深是嘴巴，吃落东西填勿满，呒没底；顶难是讲说话，如果侬早开口叫我老婆婆，茶早给侬了，侬讲开口讲话难勿难？”

学生回来对先生一讲，先生感叹地讲：“是呀！世上讲话是顶难，讲重了也是一句，讲轻了也是一句。所以出门讲说话，要懂道理，讲礼貌！”