讲述：王家有

记录：顾维男

有个抲鱼人，年纪蛮大，还是光棍。他每天到龙王庙去烧香，求龙王赐福。一连求了三年，海龙王被求得过意勿去，叫自己九公子投胎，给他做儿子。

从此，光棍脚肚子慢慢大起来，九个月大得像只酒坛，十个月，酒坛裂开，爆出一只海癞头①。小小海癞头，背着一只壳，立着会走路，对着光棍叫“阿爹”。光棍一听，欢喜煞了，把他当作儿子养着，有饭给他先吃饱，宁可自己饿肚皮。

有一日，光棍出海抲鱼，海癞头也跟着去了。这日天气交关好，太阳猛猛，风平浪静，出海抲鱼的船交交关。船刚到洋地，海癞头讲：“阿爹，大风大浪要来，还是回去算了。”光棍勿相信。海癞头一定要回去，光棍只好回洋。夜快人家来讲：“洋里发大风，抲鱼船刮翻好几只。”光棍才晓得海癞头会看天气。以后出海，总是带着海癞头，海癞头讲回洋了，总有大风要来，万试万灵。别的抲鱼船看光棍船回洋，他们也回洋。

有一日，海癞头对光棍讲：“阿爹，人家后生统有老婆，我也要有。”光棍心里也忖抱孙子，可惜嘴里叹口气讲：“儿子哎，侬这副相貌啥人要。”

“阿爹，渔老板有个囡，侬给我去讲讲看。”

光棍心忖，莫讲渔老板的囡，就是抲鱼人家也难开口呵！为了了却宝贝儿子的心愿，光棍还是决定去触—遭霉头。他走到渔老板屋里，讲起这桩亲事，渔老板心里发笑，这只海癞头，咋好要我囡做老婆，真想吃天鹅肉了。就索性寻光棍开心：“侬海癞头儿子和我囡成亲可以，聘礼我勿要，结婚要抬花轿，我家到侬家路勿好，这条路用金砖铺铺平，再要一个五色满天帐篷，咋话？ ”光棍一听傻眼了，闲话一句也讲勿出。

光棍回到屋里，对儿子讲了渔老板的要求。海癞头讲：“阿爹，介眼东西勿难做到，侬只管答应好了。”光棍一听呆煞了，海癞头儿子有介大本领。光棍又去对渔老板讲： “侬讲的统会办到。”渔老板讲：“那好，明朝天一亮成亲。”

海癞头召来虾兵蟹将，一夜时间，把金砖铺好，五色满天帐篷搭好。第二天，天一亮，渔老板真悔煞。可是闲话已出口赖勿掉，只好把囡嫁过去，囡哭哭啼啼真伤心煞。

想勿到夜里拜堂时，海癞头变成一个白面书生，两夫妻蛮要好，可惜老公夜里是人，日里依旧是海癞头。日子越长，渔老板囡心里越难熬。

过了一段日子，渔老板囡肚皮里有小人了。一日夜里，她翻来复去睏勿熟，心忖：老公日里变海癞头，总有壳有皮。就轻轻爬起，到处寻，最后在马桶下面寻着了，她把皮壳塞到灶洞里烧掉。回到房里，老公醒了，讲：“娘子哎， 我是龙王九公子，奉父王之命，陪光棍到死。为他生个后代，就好回龙宫去了，忖忖光棍待我介好，侬对我也有情义，我勿回去了，日夜统变人，陪侬到死。”

从此，光棍一家，鱼抲抲，生活蛮开心。

①海癞头：即海龟。